har ek naqsh-e-qadam sham-e-farozan hota jata hai

har ik naqsh-e-qadam sham-e-farozāñ hotā jaatā hai

jahāñ se vo guzarte haiñ charāġhāñ hotā jaatā hai

haiñ sad.hā chaak aisī zindagī bhī zindagī kyā hai

libās-e-zīst āshiq kā garebāñ hotā jaatā hai

na pūchho jāñ-fazā hai kitnā husn-e-yār kā mausam

ki jo manzar bhī hai sub.h-e-bahārāñ hotā jaatā hai

sanam ko bhuul kar dil kyoñ ḳhudā kī samt maa.il hai

ḳhudā jaane ye kāfir kyoñ musalmāñ hotā jaatā hai

mubārak haiñ qadam ahl-e-vafā ke rāh-e-ulfat meñ

ki in qadmoñ se rāhoñ meñ charāġhāñ hotā jaatā hai

sitam ke baad iz.hār-e-nadāmat bhī hai kyā kahiye

sitam bhī kartā jaatā hai pashemāñ hotā jaatā hai

'payām' us ko maiñ apnāne ko jitnā baḌhtā jaatā huuñ

ḳhudā jaane vo kyoñ mujh se gurezāñ hotā jaatā hai

har ek naqsh-e-qadam sham-e-farozan hota jata hai

jahan se wo guzarte hain charaghan hota jata hai

hain sadha chaak aisi zindagi bhi zindagi kya hai

libas-e-zist aashiq ka gareban hota jata hai

na puchho jaan-faza hai kitna husn-e-yar ka mausam

ki jo manzar bhi hai subh-e-bahaaran hota jata hai

sanam ko bhul kar dil kyon KHuda ki samt mail hai

KHuda jaane ye kafir kyon musalman hota jata hai

mubarak hain qadam ahl-e-wafa ke rah-e-ulfat mein

ki in qadmon se rahon mein charaghan hota jata hai

sitam ke baad izhaar-e-nadamat bhi hai kya kahiye

sitam bhi karta jata hai pasheman hota jata hai

'payam' us ko main apnane ko jitna baDhta jata hun

KHuda jaane wo kyon mujh se gurezan hota jata hai