har ek nazar ko shuur-e-jamal-e-yar nahin

har ik nazar ko shu.ūr-e-jamāl-e-yār nahīñ

bahār ahl-e-havas ke liye bahār nahīñ

taġhayyurāt kī manzil kā naam hai duniyā

yahāñ ḳhushī kī tarah ġham bhī pā.edār nahīñ

ajiib shai hai mohabbat vo sāmne haiñ magar

nazar ko pyaas bujhāne kā iḳhtiyār nahīñ

kalī ko phuul banātā hai us kā husn-e-qubūl

bahār phuul banāne kī zimma-dār nahīñ

mire liye na pareshāñ hoñ mai-kade vaale

sharāb jaam se piinā mirā shi.ār nahīñ

badal badal ke nigāhoñ ke zāviye tum ne

mujhe vo dard diyā hai jo nāgavār nahīñ

talab ko tark-e-talab meñ samo chukā huuñ maiñ

ab intizār meñ talḳhī-e-intizār nahīñ

mirī nazar meñ vo ma.asūm phuul bhī haiñ 'nihāl'

chaman meñ jin ko tabassum kā iḳhtiyār nahīñ

har ek nazar ko shuur-e-jamal-e-yar nahin

bahaar ahl-e-hawas ke liye bahaar nahin

taghayyuraat ki manzil ka nam hai duniya

yahan KHushi ki tarah gham bhi paedar nahin

ajib shai hai mohabbat wo samne hain magar

nazar ko pyas bujhane ka iKHtiyar nahin

kali ko phul banata hai us ka husn-e-qubul

bahaar phul banane ki zimma-dar nahin

mere liye na pareshan hon mai-kade wale

sharab jam se pina mera shiar nahin

badal badal ke nigahon ke zawiye tum ne

mujhe wo dard diya hai jo nagawar nahin

talab ko tark-e-talab mein samo chuka hun main

ab intizar mein talKHi-e-intizar nahin

meri nazar mein wo masum phul bhi hain 'nihaal'

chaman mein jin ko tabassum ka iKHtiyar nahin