ہر اک قدم پہ ٹھوکروں کا حوصلہ بھی چاہیے

ہر اک قدم پہ ٹھوکروں کا حوصلہ بھی چاہیے

مسرتوں کو تلخیوں کا آئنہ بھی چاہیے

خلاؤں میں بھٹک کے کون پا سکا ہے زندگی

خودی کی پرورش کے واسطے فضا بھی چاہیے

ابھی خودی تو کمتری کا کاسۂ گدائی ہے

فریب ذوق آرزو کی انتہا بھی چاہیے

کھنک رہی ہیں ساغروں میں مضطرب حقیقتیں

حقیقتوں کی دل کشی کا تجزیا بھی چاہیے

خیال آفرینیوں کا نام تو نہیں حیات

تسلیوں کو خاک و خوں کا راستہ بھی چاہیے

ابھی تھے لب پہ سر خوشی کے گیت اب یہ ہچکیاں

معاف کر شکست ساز کو صدا بھی چاہیے

ہوں ننگ مے کدہ بہار مے کدہ کو اے کمالؔ

مری ہی تشنگی کا لیکن آسرا بھی چاہیے