har ek surat mein tujhko jaante hain

har ik sūrat meñ tujh ko jānte haiñ

ham is bahrūp ko pahchānte haiñ

hai qādir to ḳhudā lekin butāñ bhī

vo kar chukte haiñ jo kuchh Thānte haiñ

tū nāseh maan yā mat maan lekin

tirī bāteñ koī ham jānte haiñ

ga.e gauhar ke tājir jis taraf se

ham un rastoñ kī maaTī chhānte haiñ

na sambhlā āsmāñ se ishq kā bojh

hamīñ haiñ jo ye magdar bhānte haiñ

murīd-e-ḳhāndān-e-ishq jo hai

ham apnā piir use gardānte haiñ

kalī māreñ haiñ do raka.at pe zāhid

na DañD peleñ na magdar bhānte haiñ

bahut jaage ham us mahfil meñ 'qā.em'

koī dam ab to chādar tānte haiñ

har ek surat mein tujh ko jaante hain

hum is bahrup ko pahchante hain

hai qadir to KHuda lekin butan bhi

wo kar chukte hain jo kuchh Thante hain

tu naseh man ya mat man lekin

teri baaten koi hum jaante hain

gae gauhar ke tajir jis taraf se

hum un raston ki maTi chhante hain

na sambhla aasman se ishq ka bojh

hamin hain jo ye magdar bhante hain

murid-e-KHandan-e-ishq jo hai

hum apna pir use gardante hain

kali maren hain do rakat pe zahid

na DanD pelen na magdar bhante hain

bahut jage hum us mahfil mein 'qaem'

koi dam ab to chadar tante hain