har ek ye kahta hai ab kar-e-din to kuchh bhi nahin

har ik ye kahtā hai ab kār-e-dīñ to kuchh bhī nahīñ

ye sach bhī hai ki mazā be-yaqīñ to kuchh bhī nahīñ

tamām umr yahāñ ḳhaak uḌā ke dekh liyā

ab āsamān ko dekhūñ zamīñ to kuchh bhī nahīñ

mirī nazar meñ to bas hai unhīñ se raunaq-e-bazm

vahī nahīñ haiñ jo ai ham-nashīñ to kuchh bhī nahīñ

haram meñ mujh ko nazar aa.e sirf zāhid-e-ḳhushk

makān ḳhuub hai lekin makīñ to kuchh bhī nahīñ

tire laboñ se hai albatta ik halāvat-e-zīst

nabāt-e-qand-e-shakar añgbīñ to kuchh bhī nahīñ

dimāġh ab to misoñ kā hai charḳh-e-chārum par

baḌhā diyā mirī ḳhvāhish ne thiiñ to kuchh bhī nahīñ

ba-qaul-e-hazrat-e-'mahshar' kalām shā.er kā

pasand aa.e to sab kuchh nahīñ to kuchh bhī nahīñ

vo kahte haiñ ki tumhīñ ho jo kuchh ho ai 'akbar'

ham apne dil meñ haiñ kahte hamīñ to kuchh bhī nahīñ

har ek ye kahta hai ab kar-e-din to kuchh bhi nahin

ye sach bhi hai ki maza be-yaqin to kuchh bhi nahin

tamam umr yahan KHak uDa ke dekh liya

ab aasaman ko dekhun zamin to kuchh bhi nahin

meri nazar mein to bas hai unhin se raunaq-e-bazm

wahi nahin hain jo ai ham-nashin to kuchh bhi nahin

haram mein mujh ko nazar aae sirf zahid-e-KHushk

makan KHub hai lekin makin to kuchh bhi nahin

tere labon se hai albatta ek halawat-e-zist

nabaat-e-qand-e-shakar angbin to kuchh bhi nahin

dimagh ab to mison ka hai charKH-e-chaarum par

baDha diya meri KHwahish ne thin to kuchh bhi nahin

ba-qaul-e-hazrat-e-'mahshar' kalam shaer ka

pasand aae to sab kuchh nahin to kuchh bhi nahin

wo kahte hain ki tumhin ho jo kuchh ho ai 'akbar'

hum apne dil mein hain kahte hamin to kuchh bhi nahin