har irada sina-e-shamshir mein Duba hua

har irāda sīna-e-shamshīr meñ Duubā huā

haal hai kis nashsha-e-tasḳhīr meñ Duubā huā

aañkh to ab tak tilism-e-ḳhāl-o-ḳhad kī hai asiir

dil nikaltā hī nahīñ tasvīr meñ Duubā huā

harf to saare ke saare be-sadā mujh ko lage

ḳhat agarche thā bahut tahrīr meñ Duubā huā

bām-e-dar ke TūTne meñ hī kahīñ maujūd hai

ek imkāñ ḳhvāhish-e-ta.amīr meñ Duubā huā

vo achānak sāmne aayā to mujh ko yuuñ lagā

ḳhvāb thā jaise koī ta.abīr meñ Duubā huā

khīñch lā.eñge use 'jāved'-ahmad ek din

adl hai kis halqa-e-zanjīr meñ Duubā huā

har irada sina-e-shamshir mein Duba hua

haal hai kis nashsha-e-tasKHir mein Duba hua

aankh to ab tak tilism-e-KHal-o-KHad ki hai asir

dil nikalta hi nahin taswir mein Duba hua

harf to sare ke sare be-sada mujh ko lage

KHat agarche tha bahut tahrir mein Duba hua

baam-e-dar ke TuTne mein hi kahin maujud hai

ek imkan KHwahish-e-tamir mein Duba hua

wo achanak samne aaya to mujh ko yun laga

KHwab tha jaise koi tabir mein Duba hua

khinch laenge use 'jawed'-ahmad ek din

adl hai kis halqa-e-zanjir mein Duba hua