ہر جفا چھوٹی لگی سارے ستم چھوٹے لگے

ہر جفا چھوٹی لگی سارے ستم چھوٹے لگے

اپنا غم اتنا بڑا تھا سب کے غم چھوٹے لگے

پیاس کی شدت میں دریا کو بھی شبنم کہہ گئے

دامن دل تنگ تھا دست کرم چھوٹے لگے

بزم کے شیشوں کا سارا حسن غارت ہو گیا

آنکھ ساقی سے ملی اور جام جم چھوٹے لگے

وہ سراپا میرے لفظوں میں سماتا ہی نہیں

اس کو میں کیسے لکھوں لوح و قلم چھوٹے لگے

جس کی حد کوئی نہ ہو آئے بھی کیسے ذہن میں

وہ جو بے پردہ ہوا دیر و حرم چھوٹے لگے

ایک بچے کا ہمکنا چاند چھونے کے لئے

اونچا قد رکھتے ہوئے بھی آج ہم چھوٹے لگے

اپنی مٹی کا کچھ ایسا قرض تھا مجھ پر رئیسؔ

زندگی بھر زندگی کے پیچ و خم چھوٹے لگے