har jafa chhoTi lagi sare sitam chhoTe lage

har jafā chhoTī lagī saare sitam chhoTe lage

apnā ġham itnā baḌā thā sab ke ġham chhoTe lage

pyaas kī shiddat meñ dariyā ko bhī shabnam kah ga.e

dāman-e-dil tang thā dast-e-karam chhoTe lage

bazm ke shīshoñ kā saarā husn ġhārat ho gayā

aañkh saaqī se milī aur jām-e-jam chhoTe lage

vo sarāpā mere lafzoñ meñ samātā hī nahīñ

us ko maiñ kaise likhūñ lauh-o-qalam chhoTe lage

jis kī had koī na ho aa.e bhī kaise zehn meñ

vo jo be-parda huā dair-o-haram chhoTe lage

ek bachche kā humaknā chāñd chhūne ke liye

ūñchā qad rakhte hue bhī aaj ham chhoTe lage

apnī miTTī kā kuchh aisā qarz thā mujh par 'ra.īs'

zindagī bhar zindagī ke pech-o-ḳham chhoTe lage

har jafa chhoTi lagi sare sitam chhoTe lage

apna gham itna baDa tha sab ke gham chhoTe lage

pyas ki shiddat mein dariya ko bhi shabnam kah gae

daman-e-dil tang tha dast-e-karam chhoTe lage

bazm ke shishon ka sara husn ghaarat ho gaya

aankh saqi se mili aur jam-e-jam chhoTe lage

wo sarapa mere lafzon mein samata hi nahin

us ko main kaise likhun lauh-o-qalam chhoTe lage

jis ki had koi na ho aae bhi kaise zehn mein

wo jo be-parda hua dair-o-haram chhoTe lage

ek bachche ka humakna chand chhune ke liye

uncha qad rakhte hue bhi aaj hum chhoTe lage

apni miTTi ka kuchh aisa qarz tha mujh par 'rais'

zindagi bhar zindagi ke pech-o-KHam chhoTe lage