har jagah har waqt goya ek kami tere baghair

har jagah har vaqt goyā ik kamī tere baġhair

kyā huī jaatī hai merī zindagī tere baġhair

maut kā ġham hai na jiine kī ḳhushī tere baġhair

zindagī hai ehtijāj-e-zindagī tere baġhair

aah niklī hoñT kāñpe ashk āñkhoñ meñ bhar aa.e

muskurāne kī agar koshish bhī kī tere baġhair

ai hama husn-o-nazākat ai mujassam rang-o-bū

dil-girafta hai chaman meñ har kalī tere baġhair

dekhte hī dekhte fitrat meñ aayā inqalāb

ik numāyāñ tīrgī hai raushnī tere baġhair

ab vahāñ maiñ huuñ jahāñ ye bhī samajh saktā nahīñ

kis tarah aatī hai duniyā meñ hañsī tere baġhair

hai amānat-dār-e-ḳhāmoshī mire muñh meñ zabān

hā.e-re ḳhud-iḳhtiyārī bebasī tere baġhair

'ishq se takmīl-e-husn aur husn se takmīl-e-‘ishq

ik kamī mere baġhair aur ik kamī tere baġhair

sar ho sajde meñ to dil meñ kaun ho tere sivā

ai ma’āz-allāh terī bandagī tere baġhair

ek taara Tuut kar tārīkiyoñ meñ kho gayā

raat 'iram' ne is tarah ek aah kī tere baġhair

har jagah har waqt goya ek kami tere baghair

kya hui jati hai meri zindagi tere baghair

maut ka gham hai na jine ki KHushi tere baghair

zindagi hai ehtijaj-e-zindagi tere baghair

aah nikli honT kanpe ashk aankhon mein bhar aae

muskurane ki agar koshish bhi ki tere baghair

ai hama husn-o-nazakat ai mujassam rang-o-bu

dil-girafta hai chaman mein har kali tere baghair

dekhte hi dekhte fitrat mein aaya inqalab

ek numayan tirgi hai raushni tere baghair

ab wahan main hun jahan ye bhi samajh sakta nahin

kis tarah aati hai duniya mein hansi tere baghair

hai amanat-dar-e-KHamoshi mere munh mein zaban

hae-re KHud-iKHtiyari bebasi tere baghair

'ishq se takmil-e-husn aur husn se takmil-e-‘ishq

ek kami mere baghair aur ek kami tere baghair

sar ho sajde mein to dil mein kaun ho tere siwa

ai ma’az-allah teri bandagi tere baghair

ek tara Tut kar tarikiyon mein kho gaya

raat 'iram' ne is tarah ek aah ki tere baghair