har jazr-o-mad se dast-o-baghal uThte hain KHarosh

har jazr-o-mad se dast-o-baġhal uThte haiñ ḳharosh

kis kā hai raaz bahr meñ yārab ki ye haiñ josh

abrū-e-kaj hai mauj koī chashm hai habāb

motī kisī kī baat hai siipī kisī kā gosh

un muġhbachoñ ke kūche hī se maiñ kyā salām

kyā mujh ko tauf-e-ka.aba se meñ rind-e-dard-nosh

hairat se hove partav-e-mah nuur ā.īna

tū chāñdnī meñ nikle agar ho safed-posh

kal ham ne sair-e-bāġh meñ dil haath se diyā

ik saada gul-farosh kā aa kar sabad ba-dosh

jaatā rahā nigāh se juuñ mausam-e-bahār

aaj us baġhair dāġh-e-jigar haiñ siyāh-posh

shab is dil-e-girafta ko vā kar ba-zor-e-mai

baiThe the shīra-ḳhāne meñ ham kitne harzā-kosh

aa.ī sadā ki yaad karo duur rafta ko

'ibrat bhī hai zarūr Tak ai jam' tez hosh

jamshed jis ne vaz' kiyā jaam kyā huā

ve nasīhateñ kahāñ ga.iiñ kīdhar ve nāv-nosh

juz laala us ke jaam se paate nahīñ nishāñ

hai kokanār us kī jagah ab subū ba-dosh

jhūme hai bed jā-e-javānān mai-gusār

bālā-e-ḳham hai ḳhisht sar pair mai-farosh

'mīr' is ġhazal ko ḳhuub kahā thā zamīr ne

par ai zabāñ-darāz bahut ho chukī ḳhamosh

har jazr-o-mad se dast-o-baghal uThte hain KHarosh

kis ka hai raaz bahr mein yarab ki ye hain josh

abru-e-kaj hai mauj koi chashm hai habab

moti kisi ki baat hai sipi kisi ka gosh

un mughbachon ke kuche hi se main kya salam

kya mujh ko tauf-e-kaba se mein rind-e-dard-nosh

hairat se howe partaw-e-mah nur aaina

tu chandni mein nikle agar ho safed-posh

kal hum ne sair-e-bagh mein dil hath se diya

ek sada gul-farosh ka aa kar sabad ba-dosh

jata raha nigah se jun mausam-e-bahaar

aaj us baghair dagh-e-jigar hain siyah-posh

shab is dil-e-girafta ko wa kar ba-zor-e-mai

baiThe the shira-KHane mein hum kitne harza-kosh

aai sada ki yaad karo dur rafta ko

'ibrat bhi hai zarur Tak ai jam' tez hosh

jamshed jis ne waz' kiya jam kya hua

we nasihaten kahan gain kidhar we naw-nosh

juz lala us ke jam se pate nahin nishan

hai kokanar us ki jagah ab subu ba-dosh

jhume hai bed ja-e-jawanan mai-gusar

baala-e-KHam hai KHisht sar pair mai-farosh

'mir' is ghazal ko KHub kaha tha zamir ne

par ai zaban-daraaz bahut ho chuki KHamosh