har KHauf har KHatar se guzarna bhi sikhiye

har ḳhauf har ḳhatar se guzarnā bhī sīkhiye

jiinā hai gar aziiz to marnā bhī sīkhiye

ye kyā ki Duub kar hī mile sāhil-e-najāt

sailāb-e-ḳhūñ se paar utarnā bhī sīkhiye

aisā na ho ki ḳhvāb hī rah jaa.e zindagī

jo dil meñ Thāniye use karnā bhī sīkhiye

bigḌe bahut kashākash-e-nāz-o-niyāz meñ

ab us kī anjuman meñ sañvarnā bhī sīkhiye

hotā hai pastiyoñ ke muqaddar meñ bhī uruuj

ik mauj-e-tah-nashīñ kā ubharnā bhī sīkhiye

auroñ kī sard-mehrī kā shikva bajā 'sahar'

ḳhud apne dil ko pyaar se bharnā bhī sīkhiye

har KHauf har KHatar se guzarna bhi sikhiye

jina hai gar aziz to marna bhi sikhiye

ye kya ki Dub kar hi mile sahil-e-najat

sailab-e-KHun se par utarna bhi sikhiye

aisa na ho ki KHwab hi rah jae zindagi

jo dil mein Thaniye use karna bhi sikhiye

bigDe bahut kashakash-e-naz-o-niyaz mein

ab us ki anjuman mein sanwarna bhi sikhiye

hota hai pastiyon ke muqaddar mein bhi uruj

ek mauj-e-tah-nashin ka ubharna bhi sikhiye

auron ki sard-mehri ka shikwa baja 'sahar'

KHud apne dil ko pyar se bharna bhi sikhiye