har KHwab ki jab ulTi tabir nazar aai

har ḳhvāb kī jab ulTī ta.abīr nazar aa.ī

taḳhrīb ke pahlū meñ ta.amīr nazar aa.ī

tanhā.ī meñ jab guzre taḳh.īl kī rāhoñ se

tā-hadd-e-nazar us kī tasvīr nazar aa.ī

us husn-e-mujassam kī ma.asūm nigāhoñ meñ

duniyā-e-mohabbat kī tafsīr nazar aa.ī

is ālam-e-hastī meñ ālām-o-masarrat kī

har shaḳhs ke pairoñ meñ zanjīr nazar aa.ī

jis raah se guzre haiñ har ek nafas ham ko

tadbīr se vābasta taqdīr nazar aa.ī

dil bujhne lagā jab se dhuñdle hue ā.īne

mauhūm zamāne kī tasvīr nazar aa.ī

har KHwab ki jab ulTi tabir nazar aai

taKHrib ke pahlu mein tamir nazar aai

tanhai mein jab guzre taKHil ki rahon se

ta-hadd-e-nazar us ki taswir nazar aai

us husn-e-mujassam ki masum nigahon mein

duniya-e-mohabbat ki tafsir nazar aai

is aalam-e-hasti mein aalam-o-masarrat ki

har shaKHs ke pairon mein zanjir nazar aai

jis rah se guzre hain har ek nafas hum ko

tadbir se wabasta taqdir nazar aai

dil bujhne laga jab se dhundle hue aaine

mauhum zamane ki taswir nazar aai