har kisi KHwab ke chehre pe likhun nam tera

har kisī ḳhvāb ke chehre pe likhūñ naam tirā

maiñ use apnā hunar samjhūñ ki in.aam tirā

titliyāñ phuul meñ kyā DhūñDhtī rahtī haiñ sadā

kyā kaheñ bād-e-sabā rakh ga.ī paiġhām tirā

jis tarah rañg-e-shafaq jhiil meñ ghul jaatā hai

aks-e-lab aise utartā hai tah-e-jām tirā

raat aa.egī to dikhlā.egā kuchh aur hī rañg

vo jo din bhar to parāyā lagā aur shaam tirā

faqat is soch meñ haath uThte nahīñ vaqt-e-duā

maiñ bhalā kis tarah samjhā.ūñ tujhe kaam tirā

tāqche gosha-e-dil fikr-o-amal chhān chuke

kisī hālat meñ bhī miltā nahīñ islām tirā

sham.a bujhtī hai to duniyā meñ sahar hotī hai

ai suḳhan-var tirā āġhāz hai anjām tirā

har kisi KHwab ke chehre pe likhun nam tera

main use apna hunar samjhun ki inam tera

titliyan phul mein kya DhunDhti rahti hain sada

kya kahen baad-e-saba rakh gai paigham tera

jis tarah rang-e-shafaq jhil mein ghul jata hai

aks-e-lab aise utarta hai tah-e-jam tera

raat aaegi to dikhlaega kuchh aur hi rang

wo jo din bhar to paraya laga aur sham tera

faqat is soch mein hath uThte nahin waqt-e-dua

main bhala kis tarah samjhaun tujhe kaam tera

taqche gosha-e-dil fikr-o-amal chhan chuke

kisi haalat mein bhi milta nahin islam tera

shama bujhti hai to duniya mein sahar hoti hai

ai suKHan-war tera aaghaz hai anjam tera