ہر کسی خواب کے چہرے پہ لکھوں نام ترا

ہر کسی خواب کے چہرے پہ لکھوں نام ترا

میں اسے اپنا ہنر سمجھوں کہ انعام ترا

تتلیاں پھول میں کیا ڈھونڈھتی رہتی ہیں سدا

کیا کہیں باد صبا رکھ گئی پیغام ترا

جس طرح رنگ شفق جھیل میں گھل جاتا ہے

عکس لب ایسے اترتا ہے تہہ جام ترا

رات آئے گی تو دکھلائے گا کچھ اور ہی رنگ

وہ جو دن بھر تو پرایا لگا اور شام ترا

فقط اس سوچ میں ہاتھ اٹھتے نہیں وقت دعا

میں بھلا کس طرح سمجھاؤں تجھے کام ترا

طاقچے گوشۂ دل فکر و عمل چھان چکے

کسی حالت میں بھی ملتا نہیں اسلام ترا

شمع بجھتی ہے تو دنیا میں سحر ہوتی ہے

اے سخن ور ترا آغاز ہے انجام ترا