har koi soch mein hai kaise nikale mujhko

har koī soch meñ hai kaise nikāle mujh ko

pastiyoñ se koī neze pe uThā le mujh ko

kitnī sadiyoñ se Darāte haiñ ujāle mujh ko

apne dāman meñ koī raat chhupā le mujh ko

us se sāhil pe taḌapnā mirā dekhā na gayā

mauj ik kar ga.ī tūfāñ ke havāle mujh ko

chand qatroñ se bujhegī na havas kāñToñ kī

liye phirte haiñ 'abas paañv ke chhāle mujh ko

maiñ to bahtā huā paanī huuñ na haath ā.ūñgā

laakh sāhil se tū ā.īna banā le mujh ko

vo shanāvar hai to kyoñ mujh se churātā hai nazar

maiñ samandar huuñ kisī roz khañgāle mujh ko

zehn meñ huuñ maiñ ḳhayāloñ kā dafīna 'shāhid'

muntazir huuñ koī alfāz meñ pā le mujh ko

har koi soch mein hai kaise nikale mujh ko

pastiyon se koi neze pe uTha le mujh ko

kitni sadiyon se Daraate hain ujale mujh ko

apne daman mein koi raat chhupa le mujh ko

us se sahil pe taDapna mera dekha na gaya

mauj ek kar gai tufan ke hawale mujh ko

chand qatron se bujhegi na hawas kanTon ki

liye phirte hain 'abas panw ke chhaale mujh ko

main to bahta hua pani hun na hath aaunga

lakh sahil se tu aaina bana le mujh ko

wo shanawar hai to kyon mujh se churaata hai nazar

main samandar hun kisi roz khangale mujh ko

zehn mein hun main KHayalon ka dafina 'shahid'

muntazir hun koi alfaz mein pa le mujh ko