har lahza tamasha-e-digar dekh rahe hain

har lahza tamāshā-e-digar dekh rahe haiñ

bante hue qatroñ ko guhar dekh rahe haiñ

tanzīm tirī ahl-e-nazar dekh rahe haiñ

kāñToñ meñ numūd-e-gul-e-tar dekh rahe haiñ

chauñkī haiñ abhī niiñd meñ Duubī huī āñkheñ

khulte hue maiḳhāne kā dar dekh rahe haiñ

ab gard-e-kaf-e-pā haiñ dayār-e-mah-o-anjum

qudsī mirī parvāz-e-nazar dekh rahe haiñ

ruḳh chhūTe hue maskan-e-ādam kī taraf hai

aflāk-nashīñ azm-e-bashar dekh rahe haiñ

chhiTkī tire mukhḌe kī hai ye chāñdnī jab se

ham shaam meñ andāz-e-sahar rekh rahe haiñ

allah re tire āriz-e-tābāñ kī tajallī

dekhā nahīñ jaatā hai magar dekh rahe haiñ

ham apne hī qadmoñ kī tajallī kā tamāshā

tā-manzil-e-ḳhurshīd-o-qamar dekh rahe haiñ

kuchh log hue shauq se ḳhud zīnat-e-ātish

kuchh log tamāshā-e-sharar dekh rahe haiñ

hoñToñ pe hañsī aañkh meñ ma.asūm sharārat

nairang-e-adā shām-o-sahar dekh rahe haiñ

allāh-ġhanī husn-e-nazar kā ye karishma

āñkheñ haiñ kidhar aur kidhar dekh rahe haiñ

tāqoñ se gire jaate haiñ asnām-e-ḳhayālī

ham but-shikanī-hā-e-nazar dekh rahe haiñ

ai nabz-e-do-ālam tirī raftār meñ 'safdar'

aaj apne tarānoñ kā asar dekh rahe haiñ

har lahza tamasha-e-digar dekh rahe hain

bante hue qatron ko guhar dekh rahe hain

tanzim teri ahl-e-nazar dekh rahe hain

kanTon mein numud-e-gul-e-tar dekh rahe hain

chaunki hain abhi nind mein Dubi hui aankhen

khulte hue maiKHane ka dar dekh rahe hain

ab gard-e-kaf-e-pa hain dayar-e-mah-o-anjum

qudsi meri parwaz-e-nazar dekh rahe hain

ruKH chhuTe hue maskan-e-adam ki taraf hai

aflak-nashin azm-e-bashar dekh rahe hain

chhiTki tere mukhDe ki hai ye chandni jab se

hum sham mein andaz-e-sahar rekh rahe hain

allah re tere aariz-e-taban ki tajalli

dekha nahin jata hai magar dekh rahe hain

hum apne hi qadmon ki tajalli ka tamasha

ta-manzil-e-KHurshid-o-qamar dekh rahe hain

kuchh log hue shauq se KHud zinat-e-atish

kuchh log tamasha-e-sharar dekh rahe hain

honTon pe hansi aankh mein masum shararat

nairang-e-ada sham-o-sahar dekh rahe hain

allah-ghani husn-e-nazar ka ye karishma

aankhen hain kidhar aur kidhar dekh rahe hain

taqon se gire jate hain asnam-e-KHayali

hum but-shikani-ha-e-nazar dekh rahe hain

ai nabz-e-do-alam teri raftar mein 'safdar'

aaj apne taranon ka asar dekh rahe hain