har lamha bahr-e-waqt ki tughyaniyon mein hun

har lamha bahr-e-vaqt kī tuġhyāniyoñ meñ huuñ

Thahrūñ kahāñ ki bahte hue pāniyoñ meñ huuñ

bikhrā huā huuñ TuuTe hue ḳhvāb kī tarah

dekhā gayā huuñ jab se pareshāniyoñ meñ huuñ

hālāt kī salīb pe laTkā huā huuñ maiñ

masrūf apne aap kī qurbāniyoñ meñ huuñ

ye qaid Tuut jaa.e to shāyad sukūñ mile

maiñ apne hī vajūd ke zindāniyoñ meñ huuñ

ab zaḳhm zaḳhm hai mire ehsās kā badan

shīsha huuñ pattharoñ kī nigahbāniyoñ meñ huuñ

ābād mujh se hai mire ḳhvāboñ kī kā.enāt

maiñ vus’at-e-ḳhayāl kī vīrāniyoñ meñ huuñ

kyā ḳhush-libās log haiñ shahr-e-libās meñ

mahsūs ho rahā hai ki ‘uryāniyoñ meñ huuñ

ai 'badr' soz-e-ġham kā ujālā hai har taraf

maiñ zulmatoñ meñ rah ke bhī tābāniyoñ meñ huuñ

har lamha bahr-e-waqt ki tughyaniyon mein hun

Thahrun kahan ki bahte hue paniyon mein hun

bikhra hua hun TuTe hue KHwab ki tarah

dekha gaya hun jab se pareshaniyon mein hun

haalat ki salib pe laTka hua hun main

masruf apne aap ki qurbaniyon mein hun

ye qaid Tut jae to shayad sukun mile

main apne hi wajud ke zindaniyon mein hun

ab zaKHm zaKHm hai mere ehsas ka badan

shisha hun pattharon ki nigahbaniyon mein hun

aabaad mujh se hai mere KHwabon ki kaenat

main wus’at-e-KHayal ki viraniyon mein hun

kya KHush-libas log hain shahr-e-libas mein

mahsus ho raha hai ki ‘uryaniyon mein hun

ai 'badr' soz-e-gham ka ujala hai har taraf

main zulmaton mein rah ke bhi tabaniyon mein hun