har lamha chand chand nikharna paDa mujhe

har lamha chāñd chāñd nikharnā paḌā mujhe

milnā thā is liye bhī sañvarnā paḌā mujhe

aamad pe us kī phuul kī sūrat tamām raat

ek us kī rahguzar pe bikharnā paḌā mujhe

kaisī ye zindagī ne lagā.ī ajiib shart

jiine kī aarzū liye marnā paḌā mujhe

vaise to merī rāhoñ meñ paḌte the mai-kade

vaa.iz tirī nigāh se Darnā paḌā mujhe

ā.īna TuuT TuuT ke mujh meñ samā gayā

aur reza reza ho ke bikharnā paḌā mujhe

har lamha chand chand nikharna paDa mujhe

milna tha is liye bhi sanwarna paDa mujhe

aamad pe us ki phul ki surat tamam raat

ek us ki rahguzar pe bikharna paDa mujhe

kaisi ye zindagi ne lagai ajib shart

jine ki aarzu liye marna paDa mujhe

waise to meri rahon mein paDte the mai-kade

waiz teri nigah se Darna paDa mujhe

aaina TuT TuT ke mujh mein sama gaya

aur reza reza ho ke bikharna paDa mujhe