ہر لمحہ کرب و درد و غم و اضطراب میں

ہر لمحہ کرب و درد و غم و اضطراب میں

یعنی مری حیات ہے پیہم عذاب میں

اب دل ہمارا بن گیا خوشیوں کا مقبرہ

ہے دفن ہر خوشی اسی خانہ خراب میں

صدقے ہزار جان سے لطف سکون و عیش

اس لطف پر جو پا لیا ہے اضطراب میں

گہرائی نظر ہو تو نظارہ سہل ہے

ورنہ ہر ایک چیز چھپی ہے نقاب میں

اس ایٹمی زمانے کی سوغات ہے یہی

ہے ایک اک نفس زد قہر و عتاب میں

مقبولؔ کیا مقام شہید وفا ہے دیکھ

آب حیات پا لیا ہے زہر ناب میں