har manzar-e-hasti par kahti hai KHirad kya hai

har manzar-e-hastī par kahtī hai ḳhirad kyā hai

dekhā hai jo sach hai bhī yā ḳhvāb-e-tamannā hai

ābād tirā kūcha ushshāq se hai tere

allāh rakhe tujh ko tū hai to tamāsha hai

kyā haal kiyā tū ne apnā ġham-e-jānāñ meñ

vahshat sī barastī hai kis soch meñ Duubā hai

āzād parindoñ kī mānind junūñ merā

yā dasht meñ āvāra yā vus.at-e-sahrā hai

ye aql se duurī hai ai himmat-e-mardāna

TuuTī huī talvāreñ ab jin pe bharosa hai

ik umr kā yārāna socho to ‘sharīf-ahmad’

miTTī meñ dabā aanā rasm-o-rah-e-duniyā hai

har manzar-e-hasti par kahti hai KHirad kya hai

dekha hai jo sach hai bhi ya KHwab-e-tamanna hai

aabaad tera kucha ushshaq se hai tere

allah rakhe tujh ko tu hai to tamasha hai

kya haal kiya tu ne apna gham-e-jaanan mein

wahshat si barasti hai kis soch mein Duba hai

aazad parindon ki manind junun mera

ya dasht mein aawara ya wusat-e-sahra hai

ye aql se duri hai ai himmat-e-mardana

TuTi hui talwaren ab jin pe bharosa hai

ek umr ka yarana socho to ‘sharif-ahmad’

miTTi mein daba aana rasm-o-rah-e-duniya hai