ہر منظر حیات بڑی بے دلی کا تھا

ہر منظر حیات بڑی بے دلی کا تھا

عمر رواں کا سارا سفر واپسی کا تھا

اپنی زمیں سے اپنی جڑیں کھودنا پڑیں

ایسا بھی ایک دور مری بے حسی کا تھا

اہل فلک تو سوئے زمیں دیکھتے رہے

روئے زمیں پہ پہلا قدم آدمی کا تھا

جو سانس جا چکا وہ امانت تھا موت کی

جو آ گیا پلٹ کے وہی زندگی کا تھا

اس رن میں ہار جیت تو سب کی نظر میں ہے

اس آئنہ میں عکس مگر دروپدی کا تھا

کیا جستجو تھی کیفؔ کہ میں خود بھی کھو گیا

شاید وہ اک سفر مری گم گشتگی کا تھا