har masarrat se kinara kar liya

har masarrat se kinārā kar liyā

ham ne terā ġham gavārā kar liyā

chhaT ga.ī kuchh shām-e-ġham kī tīrgī

ashk jo ubhrā sitārā kar liyā

aañkh khultī hī nahīñ hai jis tarah

un kā sote meñ nazārā kar liyā

lutf farmāyā nigāh-e-nāz ne

apne bas meñ dil hamārā kar liyā

ai mire ġham-ḳhvār terā shukriya

maiñ ne apne ġham kā chārā kar liyā

shab kī tanhā.ī se phir ghabrā ga.e

phir yaqīn ham ne tumhārā kar liyā

sar pe tūfāñ ne uThāyā hai use

jis ne sāhil se kinārā kar liyā

dushmanī meñ jhuk ga.ī us kī kamar

āsmān ne kyā hamārā kar liyā

bin sahāre Dūbnā mushkil thā 'soz'

nā-ḳhudāoñ ko sahārā kar liyā

har masarrat se kinara kar liya

hum ne tera gham gawara kar liya

chhaT gai kuchh sham-e-gham ki tirgi

ashk jo ubhra sitara kar liya

aankh khulti hi nahin hai jis tarah

un ka sote mein nazara kar liya

lutf farmaya nigah-e-naz ne

apne bas mein dil hamara kar liya

ai mere gham-KHwar tera shukriya

main ne apne gham ka chaara kar liya

shab ki tanhai se phir ghabra gae

phir yaqin hum ne tumhaara kar liya

sar pe tufan ne uThaya hai use

jis ne sahil se kinara kar liya

dushmani mein jhuk gai us ki kamar

aasman ne kya hamara kar liya

bin sahaare Dubna mushkil tha 'soz'

na-KHudaon ko sahaara kar liya