ہر مذہب بے روح جسد ہے جذبہ کی قلاشی ہے

ہر مذہب بے روح جسد ہے جذبہ کی قلاشی ہے

راکھ کے تودے پوجتے ہیں یے کعبہ ہے وو کاشی ہے

عرش کی قیل و قال سنی افسانۂ وجد و حال سنا

ذہن کی وہ عیاشی ہے اور روح کی یہ عیاشی ہے

دل مردہ مفلوج ہیں روحیں کون جلے اور کون جلائے

اس ٹھنڈے ماحول میں بے جا شوق کی اخگر پاشی ہے

حال دل آشفتہ کا اے دیر و حرم کیا تم سے کہیں

وحشت ہر دربار سے ہے صحرا کی حاضر باشی ہے

صانع قدرت تیرے قلم کا کیا کہنا لیکن یہ بتا

نقش مٹانا نقش بنانا یہ کیسی نقاشی ہے

امن و سکوں کا یہ وقفہ مرنے کا افاقہ ہے رضویؔ

چہرے پر تہذیب امم کے وقتی یہ بشاشی ہے