har nafas dida-e-dil mein teri yaadon ka hujum

har nafas dīda-e-dil meñ tirī yādoñ kā hujūm

har ghaḌī mujh pe qayāmat kā guzar nā-mālūm

aañkh se dil meñ utartī huī yādoñ kī barāt

dasht-e-tanhā.ī meñ TuuTe hue tāroñ kā hujūm

is qadar paas ki jaise mire dil kī āvāz

is qadar duur ki jaise ho sadā-e-mauhūm

ai dil-e-ḳhāk-basar terī tabāhī taslīm

haañ dil-e-sāda-nazar terī ḳhatā.eñ mālūm

har ghaḌī yaad meñ guzrī shab-e-mātam kī tarah

phir bhī ai ishq-e-siyah-posh unheñ kyā mālūm

kal kā din apnī bahāroñ ko liye ḳhatm huā

kal kī har baat huī naqsh-e-vafā-e-mauhūm

har nafas dida-e-dil mein teri yaadon ka hujum

har ghaDi mujh pe qayamat ka guzar na-malum

aankh se dil mein utarti hui yaadon ki baraat

dasht-e-tanhai mein TuTe hue taron ka hujum

is qadar pas ki jaise mere dil ki aawaz

is qadar dur ki jaise ho sada-e-mauhum

ai dil-e-KHak-basar teri tabahi taslim

han dil-e-sada-nazar teri KHataen malum

har ghaDi yaad mein guzri shab-e-matam ki tarah

phir bhi ai ishq-e-siyah-posh unhen kya malum

kal ka din apni bahaaron ko liye KHatm hua

kal ki har baat hui naqsh-e-wafa-e-mauhum