har-nafas lashkar-e-taza-tar aur main

har-nafas lashkar-e-tāza-tar aur maiñ

hai nibard-āzmā ik sharar aur maiñ

be-nishāñ sā.ebānī ke saare nishāñ

dhuup ke dasht kā hai safar aur maiñ

shahr-e-āvārgī nisf shab kā gajar

sar-phirī ḳhvāhish-e-bām-o-dar aur maiñ

sāmne thā hī vo manzar-e-dil-ḳharāsh

ro paḌā sang-e-āshufta-sar aur maiñ

duur jaate hue tā.eroñ kī qatār

mahv-e-parvāz merī nazar aur maiñ

bādaloñ meñ kahīñ chāñd chhuptā huā

chand parchhā.iyāñ rahguzar aur maiñ

sarsarātī huī ġham-zada sī havā

duur tak ik parinde ke par aur maiñ

chaak par jab mirī shakl ubharne lagī

raqs karne lagā kūza-gar aur maiñ

sard paḌtā huā sho.ala-e-āftāb

naġhma-e-āb-jū merā ghar aur maiñ

sehar-zā raushnī kī lapeTe ridā

āsmāñ chāñd taare shajar aur maiñ

tarz-e-'yāvar' falak-gīr hotī huī

hairatī saare ahl-e-hunar aur maiñ

har-nafas lashkar-e-taza-tar aur main

hai nibard-azma ek sharar aur main

be-nishan saebani ke sare nishan

dhup ke dasht ka hai safar aur main

shahr-e-awargi nisf shab ka gajar

sar-phiri KHwahish-e-baam-o-dar aur main

samne tha hi wo manzar-e-dil-KHarash

ro paDa sang-e-ashufta-sar aur main

dur jate hue taeron ki qatar

mahw-e-parwaz meri nazar aur main

baadalon mein kahin chand chhupta hua

chand parchhaiyan rahguzar aur main

sarsaraati hui gham-zada si hawa

dur tak ek parinde ke par aur main

chaak par jab meri shakl ubharne lagi

raqs karne laga kuza-gar aur main

sard paDta hua shoala-e-aftab

naghma-e-ab-ju mera ghar aur main

sehar-za raushni ki lapeTe rida

aasman chand tare shajar aur main

tarz-e-'yawar' falak-gir hoti hui

hairati sare ahl-e-hunar aur main