ہر نفس لشکر تازہ تر اور میں

ہر نفس لشکر تازہ تر اور میں

ہے نبرد آزما اک شرر اور میں

بے نشاں سائبانی کے سارے نشاں

دھوپ کے دشت کا ہے سفر اور میں

شہر آوارگی نصف شب کا گجر

سر پھری خواہش بام و در اور میں

سامنے تھا ہی وہ منظر دل خراش

رو پڑا سنگ آشفتہ سر اور میں

دور جاتے ہوئے طائروں کی قطار

محو پرواز میری نظر اور میں

بادلوں میں کہیں چاند چھپتا ہوا

چند پرچھائیاں رہ گزر اور میں

سرسراتی ہوئی غم زدہ سی ہوا

دور تک اک پرندے کے پر اور میں

چاک پر جب مری شکل ابھرنے لگی

رقص کرنے لگا کوزہ گر اور میں

سرد پڑتا ہوا شعلۂ آفتاب

نغمۂ آب جو میرا گھر اور میں

سحر زا روشنی کی لپیٹے ردا

آسماں چاند تارے شجر اور میں

طرز یاورؔ فلک گیر ہوتی ہوئی

حیرتی سارے اہل ہنر اور میں