har nafas par ye guman hai ki KHata ho jaise

har nafas par ye gumāñ hai ki ḳhatā ho jaise

umr yuuñ guzrī ki jiine kī sazā ho jaise

maiñ ba-har-taur huuñ pāband-e-shumār-e-anfās

saaz har haal meñ majbūr-e-navā ho jaise

zindagī amr-e-mashiyyat hai magar kyā kahiye

vo nadāmat hai koī jurm kiyā ho jaise

mujh ko har hādisa-e-asr huā yuuñ mahsūs

mere hī dil ke dhaḌakne kī sadā ho jaise

is tarah naaz hai dāmān-e-tahī par mujh ko

merī mahrūmī bhī us kī hī atā ho jaise

ḳhanda-e-gul se bhī ehsās pe yuuñ choT lagī

mere hī chaak garebāñ pe hañsā ho jaise

yuuñ nibard-āzmā har nafs-o-zamīr aaj bhī hai

zindagī ma.arka-e-karb-o-balā ho jaise

arsa-e-zehn meñ yuuñ fikr hai laġhzīda ḳhirām

dasht-e-pur-ḳhār meñ ik ābla-pā ho jaise

yuuñ mirī ziist bhī bargashta hai mujh se 'at.har'

kisī be-mehr ke dāman kī havā ho jaise

har nafas par ye guman hai ki KHata ho jaise

umr yun guzri ki jine ki saza ho jaise

main ba-har-taur hun paband-e-shumar-e-anfas

saz har haal mein majbur-e-nawa ho jaise

zindagi amr-e-mashiyyat hai magar kya kahiye

wo nadamat hai koi jurm kiya ho jaise

mujh ko har hadisa-e-asr hua yun mahsus

mere hi dil ke dhaDakne ki sada ho jaise

is tarah naz hai daman-e-tahi par mujh ko

meri mahrumi bhi us ki hi ata ho jaise

KHanda-e-gul se bhi ehsas pe yun choT lagi

mere hi chaak gareban pe hansa ho jaise

yun nibard-azma har nafs-o-zamir aaj bhi hai

zindagi marka-e-karb-o-bala ho jaise

arsa-e-zehn mein yun fikr hai laghzida KHiram

dasht-e-pur-KHar mein ek aabla-pa ho jaise

yun meri zist bhi bargashta hai mujh se 'athar'

kisi be-mehr ke daman ki hawa ho jaise