har naqsh hai wajud-e-fana mere samne

har naqsh hai vajūd-e-fanā mere sāmne

hairān huuñ ye rañg hai kyā mere sāmne

ik shakl sī hai merī tarah mere rū-ba-rū

ik harf sā hai mere sivā mere sāmne

gum-sum khaḌī hai merī sadā mere ās-pās

dīvār ban ga.ī hai havā mere sāmne

khultā nahīñ ki ā.īna-e-kā.enāt meñ

kyā hai misāl-e-aks-e-navā mere sāmne

jangal kā vo safar bhī mubārak huā mujhe

jab chal rahā thā merā ḳhudā mere sāmne

ik ajnabī sadā sī ta'āqub meñ thī mire

dekhā jo muḌ ke kuchh bhī na thā mere sāmne

ab sochtā huuñ bikhrā huā dasht-e-ḳhāk meñ

ye kaun mujh ko toḌ gayā mere sāmne

'qaisar' huā thā sāmnā ik shakl se mirā

phir us ke baa'd kuchh na rahā mere sāmne

har naqsh hai wajud-e-fana mere samne

hairan hun ye rang hai kya mere samne

ek shakl si hai meri tarah mere ru-ba-ru

ek harf sa hai mere siwa mere samne

gum-sum khaDi hai meri sada mere aas-pas

diwar ban gai hai hawa mere samne

khulta nahin ki aaina-e-kaenat mein

kya hai misal-e-aks-e-nawa mere samne

jangal ka wo safar bhi mubarak hua mujhe

jab chal raha tha mera KHuda mere samne

ek ajnabi sada si ta'aqub mein thi mere

dekha jo muD ke kuchh bhi na tha mere samne

ab sochta hun bikhra hua dasht-e-KHak mein

ye kaun mujh ko toD gaya mere samne

'qaisar' hua tha samna ek shakl se mera

phir us ke ba'd kuchh na raha mere samne