har phul kisi rang ka KHushbu ka safar hai

har phuul kisī rang kā ḳhushbū kā safar hai

aur bāġh-e-jahāñ vaqt kī ik rāhguzar hai

vaadī se guzartā hai mire ḳhvāb kā dariyā

khultā sā lab-e-āb tire lutf kā dar hai

muddat se mire dil pe hai be-rang sā mausam

hai dhuup ThiThurtī huī be-sāya shajar hai

soyā huā har dard meñ ummīd kā pal hai

har raat kī dīvār pe ik naqsh-e-sahar hai

ik baar yahāñ boyā gayā zahr zamīñ meñ

bad-zā.iqa ab har na.e mausam kā samar hai

jis shahr ko kahte the kabhī shahr-e-tamannā

girtī huī dīvār se TuuTā huā dar hai

har phul kisi rang ka KHushbu ka safar hai

aur bagh-e-jahan waqt ki ek rahguzar hai

wadi se guzarta hai mere KHwab ka dariya

khulta sa lab-e-ab tere lutf ka dar hai

muddat se mere dil pe hai be-rang sa mausam

hai dhup ThiThurti hui be-saya shajar hai

soya hua har dard mein ummid ka pal hai

har raat ki diwar pe ek naqsh-e-sahar hai

ek bar yahan boya gaya zahr zamin mein

bad-zaiqa ab har nae mausam ka samar hai

jis shahr ko kahte the kabhi shahr-e-tamanna

girti hui diwar se TuTa hua dar hai