har qadam champai phulon ke khilane wale

har qadam champa.ī phūloñ ke khilāne vaale

gum na ho jaa.eñ tirī raah meñ jaane vaale

phir baḌe zor se darvāza koī band huā

phir kahā dil ne abhī ā.eñge aane vaale

umr-bhar DhūñDte-phirte rahe apnī āvāz

terī āvāz meñ āvāz milāne vaale

chāñd Thahrā sā havā band sī patte chup se

so rahe jā ke kahīñ pyaar jagāne vaale

aur agar maiñ ne tujhe dekhnā chāhā hī na ho

muñh udhar pher ke ai aañkh churāne vaale

kyā koī mere sivā mil na sakā merā harīf

merī gardan meñ mire haath pahnāne vaale

vo bhī majbūr hai ai ashk' sune kis kis kī

ek sunñe ko to lākhoñ hī sunāne vaale

har qadam champai phulon ke khilane wale

gum na ho jaen teri rah mein jaane wale

phir baDe zor se darwaza koi band hua

phir kaha dil ne abhi aaenge aane wale

umr-bhar DhunDte-phirte rahe apni aawaz

teri aawaz mein aawaz milane wale

chand Thahra sa hawa band si patte chup se

so rahe ja ke kahin pyar jagane wale

aur agar main ne tujhe dekhna chaha hi na ho

munh udhar pher ke ai aankh churane wale

kya koi mere siwa mil na saka mera harif

meri gardan mein mere hath pahnane wale

wo bhi majbur hai ai ashk' sune kis kis ki

ek sunne ko to lakhon hi sunane wale