har qadam dhoka hua hai raushni-dar-raushni

har qadam dhokā huā hai raushnī-dar-raushnī

koī mujh sā dūsrā hai raushnī-dar-raushnī

dasht-e-imkāñ bas gayā hai raushnī-dar-raushnī

aadmī sar phoḌtā hai raushnī-dar-raushnī

phir use tārīkiyoñ kī god meñ le jā.iye

zindagī be-āsrā hai raushnī-dar-raushnī

ik musalsal karb kā maarā sukūñ-nā-āshnā

aadmī hairāñ khaḌā hai raushnī-dar-raushnī

ek paikar ke tajassus meñ chalā huuñ jab bhī maiñ

ek saaya chhal gayā hai raushnī-dar-raushnī

āgahī buntī rahī hai ik dhueñ kā jaal sā

ik añdherā sā rahā hai raushnī-dar-raushnī

kho gayā hai shahr kā kirdār dīvāroñ ke biich

zor par andhī havā hai raushnī-dar-raushnī

ik dhueñ se ik dhueñ tak har tajassus kā safar

silsila dar silsila hai raushnī-dar-raushnī

hāsil-e-sad.hā yaqīñ hai ek duniyā-e-gumāñ

ek lā-hāsil ḳhalā hai raushnī-dar-raushnī

chhā gayā āñkhoñ pe ye saaya sā kis kī yaad kā

mujh ko 'tanhā' kar gayā hai raushnī-dar-raushnī

har qadam dhoka hua hai raushni-dar-raushni

koi mujh sa dusra hai raushni-dar-raushni

dasht-e-imkan bas gaya hai raushni-dar-raushni

aadmi sar phoDta hai raushni-dar-raushni

phir use tarikiyon ki god mein le jaiye

zindagi be-asra hai raushni-dar-raushni

ek musalsal karb ka mara sukun-na-ashna

aadmi hairan khaDa hai raushni-dar-raushni

ek paikar ke tajassus mein chala hun jab bhi main

ek saya chhal gaya hai raushni-dar-raushni

aagahi bunti rahi hai ek dhuen ka jal sa

ek andhera sa raha hai raushni-dar-raushni

kho gaya hai shahr ka kirdar diwaron ke bich

zor par andhi hawa hai raushni-dar-raushni

ek dhuen se ek dhuen tak har tajassus ka safar

silsila dar silsila hai raushni-dar-raushni

hasil-e-sadha yaqin hai ek duniya-e-guman

ek la-hasil KHala hai raushni-dar-raushni

chha gaya aankhon pe ye saya sa kis ki yaad ka

mujh ko 'tanha' kar gaya hai raushni-dar-raushni