har-qadam marhala-e-sabr-o-raza ho jaise

har-qadam marhala-e-sabr-o-razā ho jaise

zindagī mārka-e-karb-o-balā ho jaise

yuuñ guzar jaate haiñ duniyā se adam ke raahī

rah meñ naqsh-e-qadam-e-rāh-numā ho jaise

chup hue jaate haiñ yuuñ dekh ke sūrat merī

haal merā mire chehre pe likhā ho jaise

is tarah kaaT rahā huuñ maiñ shab-e-roz-o-hayāt

har-nafas apne liye ek sazā ho jaise

dasht meñ jaltī haiñ tā-hadd-e-nazar yuuñ sham.eñ

sar-e-har-ḳhār pe ḳhūn-e-shohadā ho jaise

riñd jhijhke to balā-noshoñ ne mahsūs kiyā

mai nahīñ jaam meñ ḳhūn-e-ġhurabā ho jaise

yuuñ shafaq-rañg sī hai aaj gulistāñ kī zamīñ

barahna-pā koī kāñToñ pe chalā ho jaise

har zabāñ par mire miTne ke haiñ charche lekin

un ke nazdīk to kuchh bhī na huā ho jaise

aaj is andāz se aa.ī mujhe hichkī 'ājiz'

bhūlne vaale ne phir yaad kiyā ho jaise

har-qadam marhala-e-sabr-o-raza ho jaise

zindagi marka-e-karb-o-bala ho jaise

yun guzar jate hain duniya se adam ke rahi

rah mein naqsh-e-qadam-e-rah-numa ho jaise

chup hue jate hain yun dekh ke surat meri

haal mera mere chehre pe likha ho jaise

is tarah kaT raha hun main shab-e-roz-o-hayat

har-nafas apne liye ek saza ho jaise

dasht mein jalti hain ta-hadd-e-nazar yun shamen

sar-e-har-KHar pe KHun-e-shohada ho jaise

rind jhijhke to bala-noshon ne mahsus kiya

mai nahin jam mein KHun-e-ghuraba ho jaise

yun shafaq-rang si hai aaj gulistan ki zamin

barahna-pa koi kanTon pe chala ho jaise

har zaban par mere miTne ke hain charche lekin

un ke nazdik to kuchh bhi na hua ho jaise

aaj is andaz se aai mujhe hichki 'ajiz'

bhulne wale ne phir yaad kiya ho jaise