ہر قدم پر دوزخ تشکیک ہے

ہر قدم پر دوزخ تشکیک ہے

ہے یقیں ہم راہ تو پھر ٹھیک ہے

ہے وسائل پر سبھی کچھ منحصر

دور کیا ہے اور کیا نزدیک ہے

بات ہاں معیار کی کچھ اور ہے

ورنہ تحفہ کیا ہے اصلاً بھیک ہے

عشق یوں تو ایک عالم پر محیط

ورنہ بس اک نکتۂ باریک ہے

الجھنیں پیچیدگی لا سمتیت

پاؤں شل ہیں راستہ تاریک ہے

میں جو کہتا ہوں غلط اور ناروا

آپ جو کہہ دیں بجا ہے ٹھیک ہے

چاند ہے لیکن ہے گہنایا ہوا

روشنی تو ہے مگر تاریک ہے

آج پھر راہیؔ کوئی تازہ غزل

ذہن میں پھر اک نئی تحریک ہے