har qadam par mujhe laghzish ka guman hota hai

har qadam par mujhe laġhzish kā gumāñ hotā hai

chashm-e-sāqī kī navāzish kā gumāñ hotā hai

ye hijābāt-e-ta.ayyun mujhe manzūr nahīñ

fikr-e-āzād ko bandish kā gumāñ hotā hai

lutf-e-paiham na sahī jaur-e-musalsal hī sahī

har tavajjoh pe navāzish kā gumāñ hotā hai

un ke aage lab-e-iz.hār pe hai mohar-e-sukūt

ek ḳhāmosh parastish kā gumāñ hotā hai

maiñ qafas meñ huuñ qafas pesh--e-nigāh-e-sayyād

par-e-parvāz meñ jumbish kā gumāñ hotā hai

sirf tum dil kī tabāhī kā sabab kyā hote

baḳht-e-nā-sāz kī sāzish kā gumāñ hotā hai

baat ye kyā hai 'urūj' in kī har ik baat meñ aaj

apnī har tarz-e-guzārish kā gumāñ hotā hai

har qadam par mujhe laghzish ka guman hota hai

chashm-e-saqi ki nawazish ka guman hota hai

ye hijabaat-e-tayyun mujhe manzur nahin

fikr-e-azad ko bandish ka guman hota hai

lutf-e-paiham na sahi jaur-e-musalsal hi sahi

har tawajjoh pe nawazish ka guman hota hai

un ke aage lab-e-izhaar pe hai mohar-e-sukut

ek KHamosh parastish ka guman hota hai

main qafas mein hun qafas pesh--e-nigah-e-sayyaad

par-e-parwaz mein jumbish ka guman hota hai

sirf tum dil ki tabahi ka sabab kya hote

baKHt-e-na-saz ki sazish ka guman hota hai

baat ye kya hai 'uruj' in ki har ek baat mein aaj

apni har tarz-e-guzarish ka guman hota hai