har qadam teri rahguzar mein hai

har qadam terī rahguzar meñ hai

merī manzil mirī nazar meñ hai

zindagī sarhad-e-ḳhatar meñ hai

manzil-e-āḳhirī nazar meñ hai

zindagī ham-rikāb ho kab tak

aadmī maut ke safar meñ hai

ishq agar hai mirī rag-o-pai meñ

husn merī nazar nazar meñ hai

is kā iqrār khul ke ho ki na ho

dil magar hirs-e-māl-o-zar meñ hai

koī sayyāh hī batā.egā

lutf jo sair meñ safar meñ hai

shadd-o-mad se hai aaj bhī jaarī

vo tasādum jo ḳhair-o-shar meñ hai

ban gayā hai balā-e-jān-e-qaum

ek saudā jo ahl-e-shar meñ hai

husn jis shai kā naam hai yaaro

dekhne vaale kī nazar meñ hai

dard-e-sar hai vatan kā har aḳhbār

sansanī sī har ik ḳhabar meñ hai

rang hī rang haiñ nigāhoñ meñ

haa.e kyā baat ham-safar meñ hai

jazba-e-ḳhair ab kahāñ 'maġhmūm'

shar hī shar aaj ke bashar meñ hai

har qadam teri rahguzar mein hai

meri manzil meri nazar mein hai

zindagi sarhad-e-KHatar mein hai

manzil-e-aKHiri nazar mein hai

zindagi ham-rikab ho kab tak

aadmi maut ke safar mein hai

ishq agar hai meri rag-o-pai mein

husn meri nazar nazar mein hai

is ka iqrar khul ke ho ki na ho

dil magar hirs-e-mal-o-zar mein hai

koi sayyah hi bataega

lutf jo sair mein safar mein hai

shadd-o-mad se hai aaj bhi jari

wo tasadum jo KHair-o-shar mein hai

ban gaya hai bala-e-jaan-e-qaum

ek sauda jo ahl-e-shar mein hai

husn jis shai ka nam hai yaro

dekhne wale ki nazar mein hai

dard-e-sar hai watan ka har aKHbar

sansani si har ek KHabar mein hai

rang hi rang hain nigahon mein

hae kya baat ham-safar mein hai

jazba-e-KHair ab kahan 'maghmum'

shar hi shar aaj ke bashar mein hai