har qadam the nae sayyaad nae dam ke sath

har qadam the na.e sayyād na.e daam ke saath

duur hotī ga.ī manzil mirī har gaam ke saath

jism mahbūs hai aur hukm-e-zabāñ-bandī hai

kitne ilzām haiñ vābasta mire naam ke saath

nasha-e-talḳhī-e-daurāñ kā asar kyā kahnā

zindagī raqs meñ hai gardish-e-ayyām ke saath

itnī ḳhush-rañg ye kāfir kabhī pahle to na thī

ḳhūn-e-hasrat to nahīñ hai mai-e-gulfām ke saath

roz-o-shab kis ke tajassus meñ sabā rahtī hai

farsh-e-gul par bhī na soī kabhī ārām ke saath

bechte haiñ sabhī īmān magar farq ye hai

koī zunnār pahan kar koī ehrām ke saath

niiñd āñkhoñ meñ khaTaktī hai hamārī 'at.har'

log kāñToñ pe bhī so jaate haiñ ārām ke saath

har qadam the nae sayyaad nae dam ke sath

dur hoti gai manzil meri har gam ke sath

jism mahbus hai aur hukm-e-zaban-bandi hai

kitne ilzam hain wabasta mere nam ke sath

nasha-e-talKHi-e-dauran ka asar kya kahna

zindagi raqs mein hai gardish-e-ayyam ke sath

itni KHush-rang ye kafir kabhi pahle to na thi

KHun-e-hasrat to nahin hai mai-e-gulfam ke sath

roz-o-shab kis ke tajassus mein saba rahti hai

farsh-e-gul par bhi na soi kabhi aaram ke sath

bechte hain sabhi iman magar farq ye hai

koi zunnar pahan kar koi ehram ke sath

nind aankhon mein khaTakti hai hamari 'athar'

log kanTon pe bhi so jate hain aaram ke sath