har rag-e-Khaar ki tahwil mein KHun hai mera

har rag-e-ḳhār kī tahvīl meñ ḳhuuñ hai merā

be-karāñ dasht dabistān-e-junūñ hai merā

naqsh-e-mauhūm hai sab vus.at-e-raz-o-aflāk

mere shahpar ke tale said-e-zabūñ hai merā

shāḳheñ talvār kī sūrat haiñ gul-o-barg haiñ sañg

dil kā ye naḳhl giraftār-e-fusūñ hai merā

zaḳhm kyā hai kisī shamshīr-e-nigah kā ejaaz

ashk kyā hai samar-e-fasl-e-darūñ hai merā

hijr kā chāñd dahaktā huā añgāra sahī

magar is se bhī kahīñ shola fuzūñ hai merā

sab mire dil pe karam us nigah-e-nāz kā hai

be-qarārī hai mirī aur na sukūñ hai merā

ġham kā zahrāb rag o pai meñ jo utrā 'ishrat'

tab ye mālūm huā mujh ko vo kyuuñ hai merā

har rag-e-KHar ki tahwil mein KHun hai mera

be-karan dasht dabistan-e-junun hai mera

naqsh-e-mauhum hai sab wusat-e-raz-o-aflak

mere shahpar ke tale said-e-zabun hai mera

shaKHen talwar ki surat hain gul-o-barg hain sang

dil ka ye naKHl giraftar-e-fusun hai mera

zaKHm kya hai kisi shamshir-e-nigah ka ejaz

ashk kya hai samar-e-fasl-e-darun hai mera

hijr ka chand dahakta hua angara sahi

magar is se bhi kahin shola fuzun hai mera

sab mere dil pe karam us nigah-e-naz ka hai

be-qarari hai meri aur na sukun hai mera

gham ka zahrab rag o pai mein jo utra 'ishrat'

tab ye malum hua mujh ko wo kyun hai mera