har sans ek hujum-e-pareshan dhuan ka tha

har saañs ik hujūm-e-pareshāñ dhuāñ kā thā

apnā vajūd sāneha jalte makāñ kā thā

ik jurm kāñch kā hī nahīñ ḳhuuñ rulāne meñ

kuchh haath kam-nigāhī-e-shīsha-garāñ kā thā

patthar to dushmanoñ ne bhī pheñke hazār baar

jo ghaav lag sakā vo faqat dostāñ kā thā

jis daam par bhī māñgā zamāne ko de diyā

har saañs koī maal ik uThtī dukāñ kā thā

jo tiir aaj dil meñ tarāzū huā kabhī

chhūTā huā vo dosto apnī kamāñ kā thā

har sans ek hujum-e-pareshan dhuan ka tha

apna wajud saneha jalte makan ka tha

ek jurm kanch ka hi nahin KHun rulane mein

kuchh hath kam-nigahi-e-shisha-garan ka tha

patthar to dushmanon ne bhi phenke hazar bar

jo ghaw lag saka wo faqat dostan ka tha

jis dam par bhi manga zamane ko de diya

har sans koi mal ek uThti dukan ka tha

jo tir aaj dil mein taraazu hua kabhi

chhuTa hua wo dosto apni kaman ka tha