har sadi mein qissa-e-mansur dohraya gaya

har sadī meñ qissa-e-mansūr dohrāyā gayā

sach kahā jis ne use suulī pe laTkāyā gayā

ham pe hī sadiyoñ se haiñ zulm-o-sitam jabr-o-alam

aur hameñ hī morid-e-ilzām Thahrāyā gayā

har zamāne meñ milegā ik sadāqat kā naqīb

har zamāne meñ use hī tauq pahnāyā gayā

ruḳh badal kar āñdhiyāñ hālāt kī uThtī rahīñ

azm meñ mere na koī farq bhī paayā gayā

kyā sunā.eñ ham shikast-e-dil kā afsāna 'jamāl'

ye vo shīsha hai jo har patthar se Takrāyā gayā

har sadi mein qissa-e-mansur dohraya gaya

sach kaha jis ne use suli pe laTkaya gaya

hum pe hi sadiyon se hain zulm-o-sitam jabr-o-alam

aur hamein hi morid-e-ilzam Thahraya gaya

har zamane mein milega ek sadaqat ka naqib

har zamane mein use hi tauq pahnaya gaya

ruKH badal kar aandhiyan haalat ki uThti rahin

azm mein mere na koi farq bhi paya gaya

kya sunaen hum shikast-e-dil ka afsana 'jamal'

ye wo shisha hai jo har patthar se Takraya gaya