har samt hai tufan-e-bala soch raha hun

har samt hai tūfān-e-balā soch rahā huuñ

qismat meñ hai kyā apnī likhā soch rahā huuñ

ye mujh ko milī kis kī sazā soch rahā huuñ

kyā mujh se huī koī ḳhatā soch rahā huuñ

kahte haiñ tavaqqo hī nahīñ mujh ko kisī se

karte haiñ magar phir bhī gilā soch rahā huuñ

kuchh pās-e-vafā ḳhuun kā rakhnā hī paḌegā

apnā to hai ho laakh burā soch rahā huuñ

tār-e-nafas-e-shauq meñ uljhā hai zamāna

anjām-e-ġham-e-shauq ho kyā soch rahā huuñ

laalī to na thī itnī kabhī shoḳh hinā kī

kyoñ aaj hai ye rang-e-hinā soch rahā huuñ

sarsabz thā kal tak so jalā aaj paḌā hai

gulshan meñ chalī kaisī havā soch rahā huuñ

karte haiñ vo ḳhud qatl pas-e-marg haiñ rote

vallāh hai ye kaisī adā soch rahā huuñ

maiñ soch rahā huuñ vo mujhe bhuul hī baiThe

kyoñ maiñ na unheñ bhuul sakā soch rahā huuñ

kyoñ mujh se ḳhafā aap haiñ kyoñ rūThe hue haiñ

kyā mujh se huī aisī ḳhatā soch rahā huuñ

muñh phere guzar jā.eñge mujh se bhī kabhī vo

pahle kabhī sochā bhī na thā soch rahā huuñ

kuchh apnī tabāhī kā nahīñ mujh ko 'ziyā' ġham

jaatī hai kidhar ab ye balā soch rahā huuñ

har samt hai tufan-e-bala soch raha hun

qismat mein hai kya apni likha soch raha hun

ye mujh ko mili kis ki saza soch raha hun

kya mujh se hui koi KHata soch raha hun

kahte hain tawaqqo hi nahin mujh ko kisi se

karte hain magar phir bhi gila soch raha hun

kuchh pas-e-wafa KHun ka rakhna hi paDega

apna to hai ho lakh bura soch raha hun

tar-e-nafas-e-shauq mein uljha hai zamana

anjam-e-gham-e-shauq ho kya soch raha hun

lali to na thi itni kabhi shoKH hina ki

kyon aaj hai ye rang-e-hina soch raha hun

sarsabz tha kal tak so jala aaj paDa hai

gulshan mein chali kaisi hawa soch raha hun

karte hain wo KHud qatl pas-e-marg hain rote

wallah hai ye kaisi ada soch raha hun

main soch raha hun wo mujhe bhul hi baiThe

kyon main na unhen bhul saka soch raha hun

kyon mujh se KHafa aap hain kyon ruThe hue hain

kya mujh se hui aisi KHata soch raha hun

munh phere guzar jaenge mujh se bhi kabhi wo

pahle kabhi socha bhi na tha soch raha hun

kuchh apni tabahi ka nahin mujh ko 'ziya' gham

jati hai kidhar ab ye bala soch raha hun