ہر سمت ہے طوفان بلا سوچ رہا ہوں

ہر سمت ہے طوفان بلا سوچ رہا ہوں

قسمت میں ہے کیا اپنی لکھا سوچ رہا ہوں

یہ مجھ کو ملی کس کی سزا سوچ رہا ہوں

کیا مجھ سے ہوئی کوئی خطا سوچ رہا ہوں

کہتے ہیں توقع ہی نہیں مجھ کو کسی سے

کرتے ہیں مگر پھر بھی گلا سوچ رہا ہوں

کچھ پاس وفا خون کا رکھنا ہی پڑے گا

اپنا تو ہے ہو لاکھ برا سوچ رہا ہوں

تار نفس شوق میں الجھا ہے زمانہ

انجام غم شوق ہو کیا سوچ رہا ہوں

لالی تو نہ تھی اتنی کبھی شوخ حنا کی

کیوں آج ہے یہ رنگ حنا سوچ رہا ہوں

سرسبز تھا کل تک سو جلا آج پڑا ہے

گلشن میں چلی کیسی ہوا سوچ رہا ہوں

کرتے ہیں وہ خود قتل پس مرگ ہیں روتے

واللہ ہے یہ کیسی ادا سوچ رہا ہوں

میں سوچ رہا ہوں وہ مجھے بھول ہی بیٹھے

کیوں میں نہ انہیں بھول سکا سوچ رہا ہوں

کیوں مجھ سے خفا آپ ہیں کیوں روٹھے ہوئے ہیں

کیا مجھ سے ہوئی ایسی خطا سوچ رہا ہوں

منہ پھیرے گزر جائیں گے مجھ سے بھی کبھی وہ

پہلے کبھی سوچا بھی نہ تھا سوچ رہا ہوں

کچھ اپنی تباہی کا نہیں مجھ کو ضیاؔ غم

جاتی ہے کدھر اب یہ بلا سوچ رہا ہوں