har samt tirgi hai nasheman jalaen hum

har samt tīrgī hai nasheman jalā.eñ ham

sahn-e-chaman meñ jashn-e-charāġhāñ manā.eñ ham

dāġhoñ se dil ke dard kā sūraj ugā.eñ ham

har shaam zindagī ko daraḳhshāñ banā.eñ ham

bichhḌe the jis maqām se mil jaao phir vahīñ

rāheñ badal ga.ī haiñ tumheñ bhī dikhā.eñ ham

ham ne kis ehtimām se kaaTī hai zindagī

ai inqilāb-e-vaqt tujhe kyā batā.eñ ham

ye silsila azal se abad tak darāz hai

kab tak sunoge aur kahāñ tak sunā.eñ ham

har samt tirgi hai nasheman jalaen hum

sahn-e-chaman mein jashn-e-charaghan manaen hum

daghon se dil ke dard ka suraj ugaen hum

har sham zindagi ko daraKHshan banaen hum

bichhDe the jis maqam se mil jao phir wahin

rahen badal gai hain tumhein bhi dikhaen hum

hum ne kis ehtimam se kaTi hai zindagi

ai inqilab-e-waqt tujhe kya bataen hum

ye silsila azal se abad tak daraaz hai

kab tak sunoge aur kahan tak sunaen hum