har samt uDi gard mere shahr-e-guman mein

har samt uḌī gard mire shahr-e-gumāñ meñ

mahsūr tamannā hai zamāne ke dhuāñ meñ

sannāTe kā jo qissa sunāne meñ magan hai

raqsāñ thā kabhī shor usī ujḌe makāñ meñ

ḳhushiyoñ ko badan par jo lapeTe hue kal thā

hai aaj sharābor vahī dard nihāñ meñ

ma.adūm huā gul kā nishāñ sahn-e-chaman se

ḳhushbū hai magar ab bhī basī bād-e-ravāñ meñ

har ḳhvāb kī ta.abīr nazar aa.ī hirāsāñ

nāpaid huā josh-e-junūñ mard-e-javāñ meñ

fardā kī galī meñ vo baḌā kaam karegī

ik zid hai khilaune kī jo ma.asūm fuġhāñ meñ

guzrī huī saa.at ko palaTne meñ lagā hai

kuchh baat nazar aa.ī use kār-e-ziyāñ meñ

pur-kaif huī 'sāhnī' har saañs kī aahaT

mauhūm ishāra jo milā vaqt-e-girāñ meñ

har samt uDi gard mere shahr-e-guman mein

mahsur tamanna hai zamane ke dhuan mein

sannaTe ka jo qissa sunane mein magan hai

raqsan tha kabhi shor usi ujDe makan mein

KHushiyon ko badan par jo lapeTe hue kal tha

hai aaj sharabor wahi dard nihan mein

madum hua gul ka nishan sahn-e-chaman se

KHushbu hai magar ab bhi basi baad-e-rawan mein

har KHwab ki tabir nazar aai hirasan

napaid hua josh-e-junun mard-e-jawan mein

farda ki gali mein wo baDa kaam karegi

ek zid hai khilaune ki jo masum fughan mein

guzri hui saat ko palaTne mein laga hai

kuchh baat nazar aai use kar-e-ziyan mein

pur-kaif hui 'sahni' har sans ki aahaT

mauhum ishaara jo mila waqt-e-giran mein