har shab ḳhayāl-e-ġhair ke maare alag-thalag
aate haiñ ḳhvāb meñ vo hamāre alag-thalag
gar ġhair saath saaye ke sūrat na thā to kyuuñ
misl-e-sabā chaman se sidhāre alag-thalag
bulbul vo huuñ ki fasl ke pahle hī bāġhbāñ
letā hai baaġh jis kā ijāre alag-thalag
dām-e-balā meñ phañste haiñ aap aa ke saikḌoñ
vo but hazār baal sañvāre alag-thalag
ai gul tujhe kisī kī na mutlaq ḳhabar huī
ġhunche chaTak chaTak ke pukāre alag-thalag
ḳhalvat meñ bhī jo aa.e haiñ jalvat kā zikr kyā
baiThe hue haiñ sharm ke maare alag-thalag
pesh-e-nazar shabīh-e-ḳhayālī hai apnī 'shād'
naqshe jame hue haiñ hamāre alag-thalag
har shab KHayal-e-ghair ke mare alag-thalag
aate hain KHwab mein wo hamare alag-thalag
gar ghair sath saye ke surat na tha to kyun
misl-e-saba chaman se sidhaare alag-thalag
bulbul wo hun ki fasl ke pahle hi baghban
leta hai bagh jis ka ijare alag-thalag
dam-e-bala mein phanste hain aap aa ke saikDon
wo but hazar baal sanware alag-thalag
ai gul tujhe kisi ki na mutlaq KHabar hui
ghunche chaTak chaTak ke pukare alag-thalag
KHalwat mein bhi jo aae hain jalwat ka zikr kya
baiThe hue hain sharm ke mare alag-thalag
pesh-e-nazar shabih-e-KHayali hai apni 'shad'
naqshe jame hue hain hamare alag-thalag
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.