har shai jahan ki gard-o-ghubar-e-KHayal hai

har shai jahāñ kī gard-o-ġhubār-e-ḳhayāl hai

āshob-gāh-e-dahr meñ jiinā muhāl hai

ye gulshan-e-yaqīñ bhī ba-juz vahm kuchh nahīñ

aalam jise kaheñ vo tilism-e-ḳhayāl hai

naira.gī-e-nazar ke sivā aur kuchh nahīñ

dūd-e-firāq jalva-e-shām-e-visāl hai

ye naġhma-e-vajūd kisī rāgnī kī raakh

ik chīḳh sāz-e-umr-e-abad kā ma.aal hai

har mauj hai ki haath se chhuTtī huī inaañ

vo jast-o-ḳhez hai ki sambhalnā muhāl hai

tapte dinoñ kī aag meñ jiine kī aarzū

shabnam ba-rū-e-gul araq-e-infi.āl hai

tanhā.iyoñ meñ baiTh ke ḳhud ko shikār kar

ye dasht-e-dil bhī dasht-e-ḳhutan kī misāl hai

har shai jahan ki gard-o-ghubar-e-KHayal hai

aashob-gah-e-dahr mein jina muhaal hai

ye gulshan-e-yaqin bhi ba-juz wahm kuchh nahin

aalam jise kahen wo tilism-e-KHayal hai

nairagi-e-nazar ke siwa aur kuchh nahin

dud-e-firaq jalwa-e-sham-e-visal hai

ye naghma-e-wajud kisi ragni ki rakh

ek chiKH saz-e-umr-e-abad ka maal hai

har mauj hai ki hath se chhuTti hui inan

wo jast-o-KHez hai ki sambhalna muhaal hai

tapte dinon ki aag mein jine ki aarzu

shabnam ba-ru-e-gul araq-e-infial hai

tanhaiyon mein baiTh ke KHud ko shikar kar

ye dasht-e-dil bhi dasht-e-KHutan ki misal hai