har shai ki aqidat se taswir nahin banti

har shai kī aqīdat se tasvīr nahīñ bantī

har ḳhāk-e-qadam yaaro iksīr nahīñ bantī

jab vaqt bigaḌtā hai hotā hai jahāñ dushman

jab baat bigaḌtī hai tadbīr nahīñ bantī

hālāt jab insāñ ko dīvāna banāte haiñ

hālāt ke hāthoñ phir zanjīr nahīñ bantī

ḳhud jehd-e-musalsal se qismat ko sañvāro tum

auroñ ke banā.e se taqdīr nahīñ bantī

māñge hue sikkoñ kā me.aar nahīñ hotā

luuTī huī daulat se jāgīr nahīñ bantī

īsār batānā hai mehrāb-e-vafā aksar

īsār ke hāthoñ se shamshīr nahīñ bantī

ai shīsha-garoñ ab tak āḳhir ye kamī kyuuñ hai

ā.īna banāte ho tasvīr nahīñ bantī

iḳhlās ke sāñche meñ Dhaltā hai asar lekin

alfāz ke pahlū meñ tāsīr nahīñ bantī

qismat ke likhe meñ kyā tarmīm karūñ 'sājid'

majbūr huuñ is jaisī tahrīr nahīñ bantī

har shai ki aqidat se taswir nahin banti

har KHak-e-qadam yaro iksir nahin banti

jab waqt bigaDta hai hota hai jahan dushman

jab baat bigaDti hai tadbir nahin banti

haalat jab insan ko diwana banate hain

haalat ke hathon phir zanjir nahin banti

KHud jehd-e-musalsal se qismat ko sanwaro tum

auron ke banae se taqdir nahin banti

mange hue sikkon ka mear nahin hota

luTi hui daulat se jagir nahin banti

isar batana hai mehrab-e-wafa aksar

isar ke hathon se shamshir nahin banti

ai shisha-garon ab tak aaKHir ye kami kyun hai

aaina banate ho taswir nahin banti

iKHlas ke sanche mein Dhalta hai asar lekin

alfaz ke pahlu mein tasir nahin banti

qismat ke likhe mein kya tarmim karun 'sajid'

majbur hun is jaisi tahrir nahin banti