har shai mein numayan hai jalwa aankhon se magar mastur bhi hai

har shai meñ numāyāñ hai jalva āñkhoñ se magar mastūr bhī hai

shah-e-rag se qarīñ hai husn-e-azal shahpar se nazar ke duur bhī hai

hai parda-andar-parda vo aur arz-o-samā kā nuur bhī hai

jab yaad karo nazdīk hai vo jab DhūñDo us ko duur bhī hai

mahdūd bhī lā-mahdūd bhī hai āzād bhī hai majbūr bhī hai

faizān-e-nazar se har zarra hoshiyār bhī hai maḳhmūr bhī hai

hai zarra zarra bhī sahrā hai qatra qatra bhī dariyā

samjho na to aiman hai patthar patthar ko jo samjho tuur bhī hai

phir jabr-o-sitam ke saa.e meñ kuchh log ḳhudā ban baiThe haiñ

muusā hī nahīñ haiñ ab varna fir.aun bhī hai aur tuur bhī hai

jaise ġhunche khil uThte haiñ tar ho kar ashk-e-shabnam se

dil shab-bhar hijr meñ ro ro kar har sub.h yūñhī masrūr bhī hai

kamzor hī se taqsīreñ haiñ majbūrī par ta.azīreñ haiñ

ye Dagar Dagar mash.hūr bhī hai ye nagar nagar dastūr bhī hai

har shai mein numayan hai jalwa aankhon se magar mastur bhi hai

shah-e-rag se qarin hai husn-e-azal shahpar se nazar ke dur bhi hai

hai parda-andar-parda wo aur arz-o-sama ka nur bhi hai

jab yaad karo nazdik hai wo jab DhunDo us ko dur bhi hai

mahdud bhi la-mahdud bhi hai aazad bhi hai majbur bhi hai

faizan-e-nazar se har zarra hoshiyar bhi hai maKHmur bhi hai

hai zarra zarra bhi sahra hai qatra qatra bhi dariya

samjho na to aiman hai patthar patthar ko jo samjho tur bhi hai

phir jabr-o-sitam ke sae mein kuchh log KHuda ban baiThe hain

musa hi nahin hain ab warna firaun bhi hai aur tur bhi hai

jaise ghunche khil uThte hain tar ho kar ashk-e-shabnam se

dil shab-bhar hijr mein ro ro kar har subh yunhi masrur bhi hai

kamzor hi se taqsiren hain majburi par taziren hain

ye Dagar Dagar mashhur bhi hai ye nagar nagar dastur bhi hai