har shaKHs asir-e-gham-e-dauran nahin hota

har shaḳhs asīr-e-ġham-e-daurāñ nahīñ hotā

har ahl-e-junūñ chāk-garebāñ nahīñ hotā

har kunj-e-qafas rashk-e-bahārāñ nahīñ hotā

har phuul matā.a-e-chamanistāñ nahīñ hotā

karte haiñ jo mañjdhār se sāhil kā tamāshā

un ko kabhī andesha-e-tūfāñ nahīñ hotā

har raat ke dāman meñ nahīñ nuur sahar kā

har nūr-e-sahar kaif-badāmāñ nahīñ hotā

har zaḳhm ko risne kī tamanna nahīñ hotī

har dard zubūñ-kesh numāyāñ nahīñ hotā

har ġham ke liye izn-e-tabassum nahīñ lāzim

har ek tabassum ġham-e-insāñ nahīñ hotā

har zarra nahīñ hotā hai 'ḳhurshīd' kā partav

ḳhurshīd har ik zarra-badāmāñ nahīñ hotā

har shaKHs asir-e-gham-e-dauran nahin hota

har ahl-e-junun chaak-gareban nahin hota

har kunj-e-qafas rashk-e-bahaaran nahin hota

har phul mataa-e-chamanistan nahin hota

karte hain jo manjdhaar se sahil ka tamasha

un ko kabhi andesha-e-tufan nahin hota

har raat ke daman mein nahin nur sahar ka

har nur-e-sahar kaif-badaman nahin hota

har zaKHm ko risne ki tamanna nahin hoti

har dard zubun-kesh numayan nahin hota

har gham ke liye izn-e-tabassum nahin lazim

har ek tabassum gham-e-insan nahin hota

har zarra nahin hota hai 'KHurshid' ka partaw

KHurshid har ek zarra-badaman nahin hota