har shaKHs liye kasa-e-ummid khaDa hai

har shaḳhs liye kāsa-e-ummīd khaḌā hai

mahsūs ye hotā hai koī qaht paḌā hai

chehroñ pe ġhubār-e-ġham-e-hālāt paḌā hai

ham ahl-e-ḳharābāt pe ye vaqt kaḌā hai

ye sach hai tirā qad to mire qad se baḌā hai

lekin tū sar-e-vādī-e-pindār khaḌā hai

ye vasl ke lamhe haiñ bahar-hāl ġhanīmat

'isyāñ kī talāfī ko baḌā vaqt paḌā hai

us shaḳhs ko kis naam se mausūm karūñ maiñ

saa.e kī tarah jo mire nazdīk khaḌā hai

ye kis ne samoī mirī guftār meñ shoḳhī

ye kaun pas-e-parda-e-alfāz khaḌā hai

alfāz kā marham nahīñ is zaḳhm kā darmāñ

jo zaḳhm tire tarz-e-takallum se paḌā hai

'bāsit' kabhī us mard-e-qalandar se bhī milte

allāh-re vo shaḳhs ki jo ḳhud se laḌā hai

har shaKHs liye kasa-e-ummid khaDa hai

mahsus ye hota hai koi qaht paDa hai

chehron pe ghubar-e-gham-e-haalat paDa hai

hum ahl-e-KHarabaat pe ye waqt kaDa hai

ye sach hai tera qad to mere qad se baDa hai

lekin tu sar-e-wadi-e-pindar khaDa hai

ye wasl ke lamhe hain bahar-haal ghanimat

'isyan ki talafi ko baDa waqt paDa hai

us shaKHs ko kis nam se mausum karun main

sae ki tarah jo mere nazdik khaDa hai

ye kis ne samoi meri guftar mein shoKHi

ye kaun pas-e-parda-e-alfaz khaDa hai

alfaz ka marham nahin is zaKHm ka darman

jo zaKHm tere tarz-e-takallum se paDa hai

'basit' kabhi us mard-e-qalandar se bhi milte

allah-re wo shaKHs ki jo KHud se laDa hai