ہر شخص وفا سے ہٹ چکا ہے

ہر شخص وفا سے ہٹ چکا ہے

شیشوں پہ غبار اٹ چکا ہے

دل تا بہ دماغ پھٹ چکا ہے

یہ شہر کا شہر الٹ چکا ہے

چہروں پہ دمک کہاں سے آئے

سورج کا وقار گھٹ چکا ہے

رشتوں میں خلوص ہی کہاں تھا

پہلے بھی یہ دودھ پھٹ چکا ہے

اظہار خلوص کرنے والا

اندر سے بہت پلٹ چکا ہے

اتنے بھی اداس کب تھے ہم لوگ

ظاہر ہے کہ دل سمٹ چکا ہے

تاریخ وفا میں کیا ملے گا

آنکھوں میں جو وقت کٹ چکا ہے

اب سامنے بھی وہ آئیں تو کیا

دل اپنی طرف پلٹ چکا ہے

دل ہے کہ اسی کی نذر انجمؔ

جس درد کا بھاؤ گھٹ چکا ہے